એક પ્રશ્નગીત

 દરિયામાં હોય એને મોતી કહેવાય છે,તો આંખોમાં હોય તેને શું?

અમે પૂછયું:લે બોલ,હવે તું………..

પંખીવછોઈ કોઈ એકલી જગ્યાને તમે માળો કહેશો કે બખોલ?

જોવાતી હોય કોઈ આવ્યાની વાટ ત્યારે ભણકારા વાગે કે ઢોલ?

બોલો સુજાણ, ઊગ્યું મારામાં ઝાડવું કે ઝાડવામાં ઊગી છું હું?

અમે પૂછયું:લે બોલ,હવે તું………..

ઊંચી ઘોડીને એનો ઊંચો અસવાર: એના મારગ મોટા કે કોલ મોટા?

દરિયો તરવાની હોડ માંડે તો દરિયાનું પાણી જીતે કે પરપોટા?

સૂરજ ન કોય તેવી રીતે ઝીંકાય છે એ તડકાઓ હોય છે કે લૂ?

અમે પૂછયું:લે બોલ,હવે તું………..

– રમેશ પારેખ